Sarrera
2008 Urria 2
ukberri.net
Uribe Kostako Amnistiaren Aldeko Mugimenduak hainbat hitzordu jarri du gaur eta hurrengo egunotan. Gaur, arratsaldeko 19:30ean, herri asanblada egingo dute Berangoko kultur etxean, “amnistiaren aldeko mugimenduaren aurkako auziaren, atxiloketen eta espetxeratzeen inguruan hausnarketa egin eta aurrera begira jartzeko”. Bihar, berriz, arratsaldeko 20:00etan gaixotasun larria eta sendaezina duen Anjel Figueroa presoaren askatasuna aldarrikatuko dute Telletxe plazan egingo den elkarretaratzean. Larunbatean, 17:30etik aurrera, “Egin aurre salbuespen egoerari. Aski da! Euskal Herriak askatasuna” lelopeko nazio manifestazioan, sakabanaketa, atxiloketak, ilegalizazioak, Parot doktrina eta beste eskubide urraketa asko salatuko dituzte Bilboko kaleetatik, Aita Donostia plazatik abiatuta. Azkenik, hilaren 11n, larunbata, elkartasunezko bertso indabada egingo dute 15:00etan Sopelan, 15 euroren truke. Izena ohiko lekuetan eman daiteke.
anjelkalera |
Berriak |
2008 Urria 1
ukberri.net
Gaixotasun larria eta sendaezina duen Anjel Figueroa Algortako preso politikoaren bizi baldintzen salaketa eta askatzeko aldarria Hego Amerikara heldu dira “Resumen Latinoamericano TV” telebista saioaren bidez. Argentinan, Uruguain eta Venezuelan zuzenean eta mundu osoan Internetez ikus daitekeen saioaren azken erreportajean, irailaren 25ekoa, Carlos Aznarez eta Maria Torrellas kazetariek Mari Karmen Fernandez Anjel Figueroaren amari egindako elkarrizketa emititu zuten. Fernandezek azaldu zuenez, Anjelekin egiten ari direna “soka estutzea da, noiz apurtuko zain, eta hori nire ustez jakindako mendekua baino ez da”. Preso algortarraren amak kontatzen du zelan espetxeetan 10 urte egin ondoren Figueroak epilepsia larria zuela jakin zutela, Kordoban jende aurrean izandako krisialdiengatik. Aurreko episodioak inkomunikazio egoerak eta Anjelek konortea galtzeak estali zituzten. Orduan lobotomia ebakuntza egin zioten presoari: “burmuina zati bat kendu eta 15 egunetara berriro eraman zuten kartzelara, Anjel osatu gabe, eta handik aurrera infernuko zuloan gaude: leku aldaketak, jipoiak…”.
Semearen gaixotasun tamaina ezagutu zutenetik gauzak nabarmen okerrera egin arren, Anjelen amak presoarekin hasieratik krudelkeriaz jokatu dutela deritzo: “Anjelen zigorra ulertezina da. Hastear zegoen komando batean zebiltzan Algortako bi mutil, urduliztar bat eta Anjel. Ezer ez zeukan zulo batengatik eta bakoitza bere aldetik hutsaren hurrengoa den hainbat konturengatik zigortu zituzten. Ez dute inor hil eta Anjeli 56 eta besteei 59 urte jarri dizkiete. Eta orain epaia irmoa dela esanez horretara mugatzen dira epaileak”.
Argiago ere azaltzen du Mari Karmen Fernandezek: “nire semeak bere ama edo neskalaguna hil izan balu, 14 urteko zigorra izango zuen eta sei urtetan kalean egongo zen”. Beste preso ezagun batzuk ere izan ditu hizpide konparazioak egiteko: “Amedo, Dominguez, GALeko guztiak… daude kalean nire semeak baino urte gehiagoko zigorrak izan arren”.
anjelkalera |
Berriak |
2008 Iraila 25
etengabe
Anjel Figueroak krisialdi epileptiko larriak izan ditu joan zen astean. Horretara, bisitara joan zitzaizkion lagunak eta familiarrak oso txarto ikusi zuten, eta etxekoekin aurrez aurreko bisitan bertan krisialdi larria izan zuen. Aurreko egunetan bestelako krisialdiak izan zituela adierazi zien etxekoei.
ASKI DA!
Anjel kalera!
PRESO GAIXOAK KALERA!
anjelkalera |
Berriak |
2008 Iraila 10
etengabe
Argazkian, joan den ostiralean egindako elkarretaratzearen irudia.
ELKARRETARATZEA: ostiralero, 20:00etan, Algortako Telletxe plazan.
Anjel Figueroa aste oso bat egin du Gurutzetako ospitalean, irailaren 1etik 8ra arte, bere egoeraren errebisioa egiteko.
Aste honetan epilepsiaren unitatean izan da, eta frogak egin ostean orain medikuen diagnostikoaren zain gelditu da.
Bestela, aipatu behar da abuztuaren 31n beste krisialdi bat izan zuela Langraitzeko espetxean, ospitalera eraman aurreko egunean hain zuzen.
Baita ere, salatu behar da ertzainek ospitalean bisita batean izandako jarrera. Bisita egin bitartean polizia gelan bertan zegoen, eta euskaraz egiteagatik eta ulertu uste zuen zerbaitengatik sekulako mehatxuak bota eta istiluak sortu zizkion aipatutako ertzainak bisitan zegoen pertsonari. Ospitalean izaten den guztietan beti antzeko egoerak sortzen dira, egokitzen zaizkion ertzainen arabera.
>> preso gaixo larriak. azken txostena. 2008.08.28 (rtf formatoa)
Anjel kalera!
Preso gaixoak askatu!
anjelkalera |
Berriak |
2008 Iraila 5
ELKARRETARATZEA: ostiralero, 20:00etan, Algortako Telletxe plazan.
Abuztuko geldiunearen ostean, 60 bat lagunek egin dute elkarretaratzea, arratsaldeko 8etan, Algortako Telletxe plazan, euren herrikide eta preso gaixo Anjel Figueroaren askatasuna aldarrikatzeko. Gaurtik aurrera, toki eta ordu berean egingo dute kontzentrazioa ostiralero. Figueroa gaixotasun larria eta sendaezina du: epilepsia. Horren ondorioz krisialdi epileptiko larriak izaten ditu, krisialdi horietan konortea galtzen du, eta tartean absentziak, memoria galerak eta haluzinazioak ere izaten ditu. Krisialdiak maizago izaten ditu eta gero eta gogorragoak, gainera. Anjel kalera! herri ekimenak, bien bitartean, presoa aske uzteko eskatzeko ekitaldi ugari egin ditu. Apirilaren 18an, Figueroa eta beste preso gaixoak askatzeko aldarrikapenari eutsi egin zioten 400 lagunek baino gehiagok, Algortan egindako manifestazioa eta ekitaldiaren bitartez. Sei egun beranduago, berriz, gure herrikidearen osasun egoeraren gaineko hitzaldia egin genuen. Ondorengo asteetan, herritarrek emandako 3.582 sinadura zuzendu genizkien Juan Jose Ibarretxe Araba, Bizkaia eta Gipuzkoako lehendakariari, Juan Antonio Perez Langraizko kartzeleko zuzendariari eta Imanol Landa Getxoko alkateari.
anjelkalera |
Berriak |
2008 Uztaila 27
ukberri.net
Uribe Kosta eta Erandioko ehunaka lagunek parte hartu dute gaur euskal preso gaixoak aska ditzaten eskatzeko Etxeratek Bizkaia, Gipuzkoa eta Lapurdiko hondartzetan deitutako mobilizazioetan. Algortako Ereagan 120 bat lagun batu dira, ikurrinez eta eskualdeko preso eta errefuxiatuen argazkiak eraman dituztela, preso gaixoen zein zigorra beteta dutenen askatasuna aldarrikatzeko. Era berean, Anjel Figueroa preso algortarrarek pairatzen duen egoeraren larritasuna nabarmendu nahi izan dute eta tortura eta sakabanaren aurkako leloak ere erabili dituzte. Bertan, ehunaka bainularien aurrean, sei txalupek altxatu dituzte presoen aldeko ikurrak, pasealekuko elkarretaratzea area arteko kalejira bihurtu den bitartean. Bainulari gehienek ondo hartu dute protestaldia, baina izan dira ere presoenganako gorrotoaren berri eman duten bakan batzuek ere.
Horrela, “pistola bat hartu eta guztiak hiltzeko modukoa” iruditu zaio elkarretaratzea adingabeko neskato ilehoridun bati, andra potolo batek presoen aldekoak “popatik hartzera” joan daitezen desiratu duen bitartean, bere buruarekin marmarka. Baina, ez da hori izan ildo nagusia eskualdean. Sopelako Barinatxe hondartzan, dozena bat nudista batu dira 60 laguneko taldeak hondartzara eraman duen presoen aldeko ekimenera. Udalerri bereko Atxabiribil hondartzan ere, bertako zortzi surflarik hartu dute parte protestaldian. Plentzian ere preso gaixoen aldeko mobilizazioa egin dute.
Kronika Sopelatik
Sopela eta Larrabasterrako Arriatera eta Barinatxe hondartzetan zehar 70 bat lagun bildu ginen hondartzetako ekimenean. Bertan, ikurrak eta Euskal Presoak Euskal Herrira aldarrikapenak lau haizetara zabaldu ziren. Hondartzatik hurbil zegoen txalupa batetik Ikurra ikus zitekeen. Era berean, surfean zebiltzan 5 kirolarik ere ikurrak astintzen zituzten. Haizearen egoera guztiz aproposa ez zenez, parapenterik ez genuen Uribe Kostako zeruetatik ikusi.
anjelkalera |
Berriak |
2008 Uztaila 18
Elkarretaratzea Paella egunean: uztailak 25, ostirala, Getxoko Aixerrotako zelaiak, 12:30.
Preso gaixo larri eta sendaezinak kalera!
ANJEL KALERA!
EUSKAL PRESOAK EUSKAL HERRIRA DAGOZKIEN ESKUBIDEEN JABE!
anjelkalera |
Berriak |
2008 Uztaila 18
Berria.info
Argazkian, maiatzaren 11n Langraizera egindako martxaren irudia.
Ahoa proposamen etikoekin, giza eskubideen aldeko aldarrikapenekin zein biktima batzuei bakarrik egindako omenaldiekin betetzen zaien horiei bideo bat ikustea gomendatuko nieke. Uribe Kostako preso politikoen Etengabe web orrian aurkitzen da. Uztailaren seian Gasteizko Legebiltzarreko Giza Eskubideen batzordean zenbait senide eta abokatuk eginiko agerraldia ikus liteke. Edozein ideologiaren gainetik, pertsona izaten jarraitzen dugun edo ez frogatzeko aukera paregabea. Bele beltzek uso zuriei buruz berba egiten diguten herri honetan.
Epilepsia diagnostikatua dauka Anjel Figueroak txikitatik. Kartzelara sartu arte erabat kontrolatuta zeukana. Baina birgizarteratzeko zentroak behar zutenek ondorio lazgarriak izaten dituzte bertan daudenen osasunarengan. Diseinatu zituztenen izpirituari jarraiki, Guantanamotik Kordobara, euren lana astiro baina ondo egiten duten giza hiltegiz josita dago mundua. Eta are zigortzaileagoak dira sistemarekin ezadostasun ideologikoa agertzen dutenekin. Galindo, Vera eta enparauek depresioa zutela esatea aski zuten kalera irten ahal izateko, euren menpeko torturatzaileak kondekoratzen zituzten bitartean. Eta ez dago preso politikorik Espainian, horregatik ez du eraginik egoera politikoak presoen egoerarengan. Horregatik igarotzen du denbora gehiago itzalpean elkarretaratze ilegal batean parte hartzen duen euskaldunak haur bortxatzaile espainiarrak baino.
Hilabetero ospitaleratzen dute Anjel, burmuinean egindako ebakuntzaren ostean askoz okerragoa baita bere egoera. Konortea galtzen du eta ez du ezer ere gogoratzen krisien ondoren. Behin eta berriz, krisi epileptikoek dakarten itotzeko edo larriki kolpatzeko arriskuarekin batera.
Zein arrisku dauka horren osasun egoera larrian dagoen pertsona askatzeak? Iraganeko sufrimenduak ernatu du egungo euskal erresistentzia. Eta zenbat lan hartzen duzuen bere etorkizuna ziurtatzen.
Fredi Paia
anjelkalera |
Berriak |
2008 Uztaila 8
etengabe
Ostiral honetan, uztailak 11, beste mobilizazioa bat egingo da Anjel Figueroaren alde Algortan.
Hitzordua: Telletxe, 20:00
Anjel kalera!
Preso gaixoak kalera!
anjelkalera |
Berriak |
2008 Uztaila 7
etengabe
60:39 minutuko bideo guztiz gomendagarria. Agerraldia osorik.
Etxerat-eko ordezkaritza bat Eusko Legebiltzarreko Giza Eskubideen Batzordean izan zen 2008ko ekainaren 26an. Jose Cruz Cotok, Egoitz Coto euskal presoaren aitak, batzordean parte hartu zuten alderdietako ordezkariei preso hauek bizi duten egoeraren inguruko txosten bat eman zien. Jose Cruz Cotorekin batera Angel Figueroaren ama Mari Carmen Fernandez, Joseba Asensio euskal preso zenaren arreba Bego Asensio eta Ainhoa Baglietto abokatua izan ziren Legebiltzarrean.
Argibide gehiagorako:
Osasun egoera larrian dauden presoen berri eman du Etxeratek Berria.info)
Tasio
Batzordeari eginiko eskaerak (2008.06.24):
1.- Mikel Ibañezen osasun egoera larria izanik, bere berehalako askatasuna eskatzea. Halaber, gaixotasun larriak eta sendaezinak dituzten gure senide presoei 92. artikulua aplikatzeko eskatzea.
2.- Gure senide preso politikoei aplikatzen zaien espetxe politikak eragiten dituen ondorio larriak salatzea. Ildo honetan, gure senideek osasun tratamendu egokia jasotzeko, eta, beren konfiantzazko medikuek gaixotasunen jarraipen zuzena egiteko beharrezko dituzten bitartekoak indarrean jartzeko exijitzea.
3.- Eusko Jaurlaritzako Barne Sailari larriki gaixorik diren gure senide presoak EAEko ospitaleren batean ingresaturik dauden bitartean gu beraiekin egoteko Ertzaintzak oztoporik ez jartzeko eskatzea.
4.- Batzorde honek larriki gaixorik diren presoak kaleratzeko esuakl jendarteak duen nahia artikulatzea exijentzia hori egiten duten ekimenak-manifestaldiak, elkarrizketak, mozioak… bultzatuz.
5.- Larriki gaixorik diren presoen askatasuna edo beste edozein eskubide aldarrikatzen duten ekimenak ez erasotzeko eskatzea batzorde honen segurtasun indarrei. Ildo horretan, Giza Eskubideen Batzordeak preso gaixoen askatasuna exijitzen duten ekimenetara bere ordezkaritza bat bidaltzeko konpromisoa hartzea.
6.- Hartzen diren erabakiak ondokoei jakinaraztea:
– Europako Parlamentuari
- Espainiako Gobernuari
- Frantziako Gobernuari
- Euskal Herriko, Espainiako eta Frantziako komunikabideei
Etxerat
anjelkalera |
Berriak, Bideoak |
