Egoera gero eta larriago

2008 Maiatza 24

Argazkian, maiatzaren 16an 20 lagun inguruk egin zuten elkarretaratzea Algortako anbulatorio aurrean.

Atzo, maiatzak 23, berriro eraman behar izan zuten Anjel Figueroa Txagorritxuko ospitalera, krisialdi larriak izan ondoren. Preso gaixo algortarraren egoeraren xehetasunak jakin artean, Figueroaren egoera egunetik egunera larriagotzen ari dela ohartarazi nahi dugu. Epilepsia krisialdiak maizago izaten ditu eta gero eta gogorragoak, gainera. Azken hilabeteetan sarri eraman behar izan dute ospitalera, krisialdien larritasunagatik. Hala ere, ordu edo egun batzuk ospitalean egon, eta berriro eraman dute Langraizko espetxera. Hartara, berriro ere preso politiko algortarra behingoz aska dezatela exijitzen dugu.

Martxoaren 20an Txagorritxuko ospitalera eraman behar izan zuten Anjel, krisialdi larria zuela eta. Hurrengo egunean eraman zuten berriz espetxera. Astebete beranduago, hilaren 27an, berriz eraman behar izan zuten Txagorritxura. Apirilaren 4a arte egon zen ospitalean. Hiru egun geroago, ordea, beste krisialdi bat izan zuen algortarrak, ohi baino gogorragoa. Hala ere, gauean ospitalera eraman, eta goizaldean berriro eraman zuten espetxera, sendagaiak eman ondoren. Bada, apirilaren 8an, 19:00etan Txagorritxura eraman eta 21:10ak aldera bueltatu ostean; hogei minutu beranduago Santiago ospitalerako bidea egin behar izan zuen Figueroak, bertan ordu eta erdi emateko. Hurrengo bi egunetan ere egin zuen erietxerako joan-etorria. Azkenik, hilaren 12an, bere ama Langraizko espetxera (Gasteiz) bisitan joan zitzaion goizean eta horrek egoera oso larrian aurkitu duela jakinarazi zuen. Bere deiari erantzunez, 30 bat lagun joan ziren kartzeleraino.

Anjel Kalera! herri ekimenak, bien bitartean, presoa aske uzteko eskatzeko ekitaldi ugari egin ditu. Apirilaren 18an, Figueroa eta beste preso gaixoak askatzeko aldarrikapenari eutsi egin zioten 400 lagunek baino gehiagok, Algortan egindako manifestazioa eta ekitaldiaren bitartez. Sei egun beranduago, berriz, gure herrikidearen osasun egoeraren gaineko hitzaldia egin genuen. Ondorengo asteetan, herritarrek emandako 3.582 sinadura zuzendu genizkien Juan Jose Ibarretxe Araba, Bizkaia eta Gipuzkoako lehendakariari, Juan Antonio Perez Langraizko kartzeleko zuzendariari eta Imanol Landa Getxoko alkateari. Maiatzaren 11n, 200 lagun inguruk egin zuten Langraizera martxa. Eta 16an 20 lagun inguruk egin zuten elkarretaratzea Algortako anbulatorio aurrean, Eusko Jaurlaritzako Osasun Sailari eta horren buru den Gabriel Inclani Anjel askatzeko aldarria bere egin dezatela eta, bide horretan, eskura dituzten baliabide guztiak erabil ditzatela eskatzeko. Bitartean, ostiralero, elkarretaratzea izaten da, 20:00etan, Telletxe plazan.

Anjel kalera! Aski da!

Berriak | Iruzkinak | Trackback